Feijóo garante o compromiso da Xunta para, entre todos, seguir avanzando na conquista da igualdade real e efectiva

• Afirma que exemplos como os das premiadas son máis actuais e necesarios que nunca: “Co voso traballo diario demostrades que a fórmula muller-ciencia é unha combinación gañadora. A través da ciencia lóitase contra as visións dogmáticas do mundo e co voso exemplo contribuídes á conquista da igualdade entre homes e mulleres”
• Subliña que as medidas postas en marcha pola Xunta como a Tarxeta Benvida, o Bono Coidado e o incremento das prazas de garderías están orientadas a axudar a compatibilizar a vida profesional coa laboral e son o mellor apoio que se pode prestar ás familias con fillos
• Incide en que nas premiadas María Josefa Wonenburger Planells cobran visibilidade as dúas palabras nesta loita pola igualdade: a concienciación e a conciliación
• Refírese tamén á violencia de xénero; “unha lacra da que temos que seguir falando, contra a que temos que seguir loitando e dicíndolle ás vítimas que non só están amparadas pola lei, senón tamén pola sociedade enteira”

Santiago, 29 de xuño de 2016.- O presidente da Xunta, Alberto Núñez Feijóo, garantiu hoxe, durante o acto de presentación da exposición fotográfica Premiadas María Josefa Wonenburger Planells, o compromiso do Goberno galego para, entre todos, seguir avanzando na conquista da igualdade real e efectiva entre homes e mulleres.

Nesta liña, afirmou que exemplos como os das premiadas son máis actuais e necesarios que nunca. “Grazas a Inmaculada Paz Andrade, María Teresa Miras Portugal, María Soengas González, Carmen Navarro Fernández-Balbuena, Ofelia Rey Castelo, María Tarsy Carballas, María José Alonso, Carmen García Mateo e Isabel Aguirre. Co voso traballo diario demostrades que a fórmula muller-ciencia é unha combinación gañadora. A través da ciencia lóitase contra as visións dogmáticas do mundo e co voso exemplo contribuídes á conquista da igualdade entre homes e mulleres”, abundou.

Así mesmo, tamén afirmou que a figura de todas elas emprázanos a reparar na presenza feminina que actualmente rexistra o campo da ciencia, “onde vemos que aínda hoxe temos que rachar con moitos estereotipos”, dixo, recordando que a pesar de que a maioría do estudantado universitario está xa composto por alumnas, no curso 2014-2015 só un 25,9% dos matriculados en arquitectura ou enxeñaría son mulleres.

Neste contexto, aseverou que as premiadas exemplifican a necesidade da muller de sentirse libres para poder realizarse en ambas facetas da vida: na laboral e na familiar. E para poder facelo sen ter que renunciar a nada. “Penso que en nomes tan recoñecidos coma os vosos cobran visibilidade dúas palabras clave nesta loita pola igualdade entre homes e mulleres: a concienciación e a conciliación”, dixo.

Sobre este segundo punto, subliñou que as medidas postas en marcha pola Xunta como a Tarxeta Benvida, o Bono Coidado e o incremento das prazas de garderías están orientadas a axudar a compatibilizar a vida profesional coa laboral e son o mellor apoio que se pode prestar ás familias con fillos.

O presidente da Xunta aseverou que con esta mostra debúxase un camiño de mulleres para mostrar que a súa pegada xamais volverá a ser borrada da historia, senón que servirá como impulso para as que veñen detrás.

Durante a súa intervención, Feijóo referiuse tamén á violencia de xénero; “unha lacra da que temos que seguir falando, contra a que temos que seguir loitando e dicíndolle ás vítimas que non só están amparadas pola lei, senón tamén pola sociedade enteira”.